2024-07-22

[公幹私用] 海南島三亞Club Med度假村

1月去完福岡玩之後,2月冇飛啦,3月本來都冇嘅,不過公司安排派去Fam Trip,咁就有得飛一轉啦。呢個Fam好簡單,就係去三亞Club Med住3日2夜。

三亞呢,就未去過啦。Club Med呢,未去之前都唔係好知道係咩嚟。其實Club Med喺國際知名嘅度假村品牌,世界各地都有據點,中國內地都有好多間,全球有80多間。而三亞呢間Club Med係由另一個度假村接手,然後重新翻新而成嘅。

Club Med主打嘅係一個一價全包嘅概念,即係話俾咗錢後,入面住嘅、食嘅、睇嘅、玩嘅大部分都係唔駛錢,齋講早午晚三餐都已經全包,餐餐都食自助餐,另外非正餐時間亦有小食供應,或者行行下去吧枱叫杯嘢飲都得,都係唔駛錢。都咪話餐餐自助餐好似好爽咁,當您喺度住成3日,連續4,5餐都自助餐,嘢食又差唔多,都咪話唔「嫌」。

講返成個行程啦,就坐香港航空出發,個零鐘機就到,飛機餐就冇啦,派咗幾塊奇華餅仔,真係多謝晒。到達三亞機場,係冇登機橋㗎,多謝晒(2),一落機,嘩,我的媽呀,好熱呀。話說當時只係3月,都可以熱到咁,對於唔鐘意夏天嘅我真係勁唔鐘意,落機之後就上架旅客巴士,丫,只係一兩分鐘就到入境大堂,然後過關搞手續等等。呢個機場嘅建築都幾有特色,無冷氣㗎,可能咁樣先有熱帶風情啦。

然後就坐十幾分鐘車去Club Med啦,差唔多到嘅時候,離遠就見到好多人著住制服列隊歡迎啦。佢哋就係G.O,我諗呢個稱呼係Club Med獨有嘅,即係(Gentle Organizer),G.O.係Club Med嘅其中一個文化,佢哋唔係一個職員,您可以當佢哋係朋友,佢哋喺度假村內亦有好多角色,會協助度假村內唔同活動,作為導師,晚上又會變成表演者!

落車後就送上Welcome Drink同毛巾,總監講咗少少歡迎說話,然後派房卡,上房,休息,因為航班有延誤,去到度假村都已中午過後了,安頓好後就一起參觀Club Med,然後就差不多晚餐了。

講講間房,面積都算很大,又有梳化,露台,露台仲有個浸池。不過可惜嘅係房入面冇浴缸,只有企缸。衛浴係開放式設計,所以係打通浴室同睡房的。

至於活動方面,度假村內可玩活動都唔少,有泳池、水上滑梯,有私家沙灘可遊水、獨木舟、風帆,陸上方面有射箭、攀石、球類活動、單車、SPA、乒乓,又有課程選擇,如瑜珈課程等。室內活動方面還有卡拉OK、桌球、麻雀等等。又是G.O.出場的時間了,因為G.O有時還會化身成運動員同大家一齊打波,如果打得贏G.O.仲會有塊金牌留為紀念。BTW,因為時間關係,我只試了單車Only。

每晚Club Med都會安排一個晚間綜藝Show,表演者又係G.O.,相當勁!而且個Show都算幾好睇,完Show後又會邀請大家一齊跳舞狂歡,仲有次跳跳跳,跳到落沙灘添,真係好癲,講緊係啲G.O.真係玩得好癲。

其實除咗呢啲度假村內活動,當然都可以安排外遊活動。度假村內有唔同嘅外遊旅程,但收費真係幾貴下,就算喺度假村內想買雪糕、或日常用品等等,都係貴到非常,不過老實講句,依家唔賺你,邊度賺丫。

三亞市內景點真係冇咩好去㗎咋,而且都係啲好大陸嘅景點(廢話),都係當歎下Resort充電玩兩晚會開心啲,外面啲,當additional算吧。

總結而言,今次出Trip都算係幾過癮,而且又唔Chur真係還得神落吧。不過今次玩單車時,卻勇戰工傷而仆街了,擦損了手腳,不過Club Med有醫務所,有護士當值,即時協助處理傷口,敷了少許藥,真的很妥當啊!

發佈留言

發佈留言必須填寫的電子郵件地址不會公開。 必填欄位標示為 *