自從廉航出現喺香港，去旅行成本大大降低，所以唔知幾時開始有獨遊出走的念頭，今次又係因為要清下假的原因，所以就揀左二月出走四日，目的地係：台中。至於點解呢篇blog要依家先寫？冇嘅，因為懶囉，下個trip又嚟緊，又係時候找番上次旅行的數了。
呢次台中遊一共玩四天(8/2-12/2)，來回搭HK Express連稅$851，早一個月襯住有個小promo的時候入手的，但之後發覺，呢個價真係低處未算低，隔幾日再上去望望竟然又平咗一百，遇著有大promo的，分分鐘4、5百蚊一張都有，所以買完勸你都唔好望番轉頭了。都OK喇，叫做早去晚返靚時間，而且我仲要講下，本來HK Express去台中每日兩班機，就係喺2月8呢一日每日加開第三班，就係咁囉。台中呢個地方之前係台灣exchange的時侯都有去過幾日，好似逢甲夜市乜乜乜之前都去過了。今次就特登揀啲未去過的地方！細細聲講，我去台中的某部分的原因，係一心想去睇下當時正在台中展出的蠟筆小新巡迴特展先去㗎，係咪有小小傻同瘋狂呢（掩眼）
買完機票就開始plan行程，台中有個小小不便的地方就係交通問題，唔似得台北或者高雄有捷運咁方便，主要交通工具一係靠公車，一係就包車，公車班次仲要又疏又少，所以排行程景點的時候一定要諗清楚，想搭車方便啲就要下載定「臺中市公車動態系統」手機app，可以搵到車之餘又可以知道架車幾時到，方便好多。因為係第一次獨遊，所以未出發時諗行程諗得勁詳細，不過有時候覺得好像想多了，去台灣又冇溝通問題，下次再獨行，唔好plan咁足，輕鬆啲就好。至於最後的行程和走法列出如下，每日行程的詳文就繼續睇下一篇blog了：
Day1 香港->台中清泉崗機場->彩虹眷村->勤美草悟道->一中夜市
Day2 台中市區->清境->青青草原
Day3 合歡山觀日->車埕->集集線小火車->集集小鎮
Day4 集集->追分.成功車站->台中紙箱王->大台中國際展覽中心(蠟筆小新特展)->回港
